視傳媒記者小雪/苗栗報導   三義鄉公所在113年11月29日(拜五)朝晨(上午)9點半起勢在圖書館五樓藝文研習中心隆重辦理113年推動客語為通行語計畫成果發表摎(及)頒獎典禮。

三義鄉係客家委員會公告个客家文化重點發展區，為著愛發揚客家文化，篤實推行客語為通行語計畫摎客語復振暨傳承客家文化毋曾懈怠，藉由成果發表摎頒獎典禮邀請大家共下來欣賞靚靚靚个客庄--三義。活動由三義子弟也係媒體從業者吳詩禹擔任主持開場，除忒展現三義鄉113年推動客語為通行語計畫个成果，同時也表揚推動客語有功个單位人員摎頒發113年通過客語能力初級、基礎級認證獎勵金，邀請大家共下出席，見證將客話「講轉來」个成效。

三義鄉公所長期煞猛推動客語為通行語計畫摎客語復振，總共發表「十六份庄頭傳奇-客英雙語故事繪本、紹介三義摺摺書、2025客家師父話三角桌曆、1970水美街景、雙湖上庄客家意象-彩繪故事、時時講客-客製時鐘」這兜同地方文史、生活結合个文創品。分客家行入生活，分生活更加客家。透過成果會將講客隨身跈等行。

1970三義水美（尾）街景復刻-客家意象彩繪

三義鄉公所長期煞猛推動客家文化个教育傳承。在客家委員會推動客語為通行語評核成效連等四年（108～111年）打「優」等。112年破天荒拿下「特優」，係客委會辦理評核以來新娘上花轎--第一擺頒發。未來各項客語推廣計畫，持續同客委會密切合作，提供在地鄉親客語服務，還過復振客語傳承發展，實踐客家族群在地主流化，邀請大家時時講客、儕儕講客，同客話越講越大聲。呂明忠鄉長更篤實踐履在各場合宣導愛同細人仔講客話，用母語客話陪細人仔長大，分三義鄉親以身為客家人為榮，永續傳承客家文化。

苗栗縣三義鄉公所113年推動客語為通行語成果暨頒獎活動

日期：113年11月29日（星期五）

地點：三義鄉圖書館五樓藝文研習中心

活動流程