記者小雪/苗栗報導

三叉河客家學堂，這位所(地方)在頭擺(以前)係三義鄉雙湖社區个活動中心，因爭在106年既經遷徙到新个位所，功成身退後，變成了閒置空間。彭歲玲老師回鄉服務將空間活化再利用，毋單止(不只是)為庄頭提供一隻做得閱讀、學習个藝文場所，乜成為復振客語推展客家文化个據點，凝聚大家力量，用豐富个客庄故事做基石，行銷客庄三叉，帶動地方發展。

三義鄉公所恁多年來推展客語有當好个成績，這擺乜大力支持三叉河客家學堂个成立，學堂負責人彭歲玲先生在鄉公所協助下，連接在地个藝術家、地方創生青年共下善用空間，打造友善團結个燒暖環境，用藝文探根庄頭。學堂外背圖牆用鄉土圖騰彩繪當餳人看，帶領大家共下探索在地文化。20號个活動同時乜係社區油畫班个成果展開幕，展覽到二月底。客家學堂日後會展出多元風貌，歡迎關注粉絲專頁。

活動暖場係由吳聲金先生帶領个龍騰薩克斯風樂團演奏輕鬆樂曲，佢兜(他們)用行動支持轉屋客家妹，共下為客家文化打拚奉獻。續下來揭牌儀式个重頭戲表演係由僑成國小邱慧玲校長帶領个女力迎龍隊，學校發展校定課程結合在地特色，舞動雲火龍，祥龍獻瑞，展現力摎美，這隻得獎無數又係全縣唯一女力團隊，用行動支持客家文化个推展同傳承。

三叉河客家學堂个外牆換著新衫，用在地文化做彩繪主題，畫出早期三義雕刻產業个木雕師傅工作室外觀，紅磚仔做个屋仔，戶外成堆个原木料，摎(與)屋簷下同人類共下(一起)生活个屋簷鳥摎燕仔，雞嫲帶細雞子(母雞帶小雞)還有滿哪仔去探索个好奇貓仔。彩繪另一個重點係三義頭擺个茶產業，該央時(當時)三義茶場生產个茶米，種茶面積大，種出个膨風茶當大量，摘茶細妹戴等笠嫲(斗笠)，手摘茶菁係滿哪仔都看得著个風景。頭擺火車頭附近个茶廠製茶景象係三義人從細都有个重要記憶，加上路脣(路邊)奉茶个大甕缸，盡做得呈現客家人醹醹个人情味。三義客家學堂彩繪工程係由曾淑敏摎陳浩宇先生帶領油畫班同學共同完成个，三叉河學堂彩繪牆面呈現个生活場景，做得分鄉親清楚了解雙湖村過去个歷史摎故事。

室內展出「上庄幸福油畫班」成果展，三義雙湖村舊地名安到“上庄仔”，庄肚个“霧鹿奇途”工作室為著發展地方創生，邀請油畫班曾淑敏摎陳浩宇先生帶領在地好畫圖个鄉親，用油畫顏料做媒介，結合鹿角蕨摎三義木料主題，創作一系列摎三義相關油畫作品，這擺就係展出佢兜个精彩作品，用畫筆摎顏料呈現三義美好个風光景色。

室內展覽有一系列在地作家彭歲玲先生个客英雙語有聲書繪本創作，彭先生係三義客家妹，第一本畫个繪本就係三義在地故事《雲火龍》、110、111年轉來帶領三義細人仔創作了繪本故事《沙鼻慢城》、《餳人个舊山線》，112年乜協助將繪本做成動畫， 113年又畫了在地真人真事个故事，創作了《十六份庄頭傳奇》，這恁多年輒常轉故鄉講故事，推動客語深根教育，這擺有機會成立了一隻小據點，希望發揮專長，用客庄故事為出發，推展客家文化。

鄉長呂明忠希望結合各領域專家人士摎在地鄉親，共下推廣，相互幫忙，一同成長、共好共榮，邀請還較多个遊客來認識當有人文个客庄三義。

三叉河客家學堂揭牌

三叉河客家學堂揭牌

三叉河客家學堂

三叉河客家學堂

「上庄幸福油畫班」成果展

「上庄幸福油畫班」成果展